Իսպանական «հեղինակավոր» կայքերից մեկը՝ Sport.es-ը, որ երևի հեղինակություն է վայելում բացառապես կատալոնյան «Բարսելոնայի» երկրպագուների շրջանում, քանի որ կատալոնյան միտվածությունը կայքի առաջին էջն այցելելիս է նկատվում, հոդված է հրապարակել, թե իբր Իսպանիայի Լա լիգայի 32-րդ տուրի շրջանակում կայացած «Ռեալ» - «Բետիս» հանդիպման ժամանակ «Սանտիագո Բեռնաբեուի» տրիբունաներից մեկից մի խումբ երկրպագուներ վանկարկել են «Կասիլյաս, դու ավանակ ես, խլուրդ ես, հեռացի´ր «Ռեալից» նախադասությունը: Թե ինչպես ստացվեց, որ միայն Sport.es-ի ժուռնալիստներին հայտնի դարձավ այս մասին, բարդ է ասել, սակայն կարևոր խնդիրն այստեղ ամենևին էլ դա չէ:
Բանն այն է, որ կայքը, մեջբերելով «Ռեալի» որոշ «երկրպագուների» արտահայտած մտքերը, գրում է, որ այդ երկրպագուները կողմ են Մոուրինյոյի վարած քաղաքականությանը, ըստ այդմ՝ ցանկանում են Իկեր Կասիլյասի հեռացումը: Բայց ինչպե՞ս կարող էր «հեղինակավոր» Sport.es-ին հայտնի դառնալ ոչ միայն այն, թե ինչ էին վանկարկում, այլև թե ովքեր ու ինչ նպատակով էին վանկարկում, հանգուցալուծում տալն էլ ավելի բարդ է թվում: Բոլորը գիտեն, որ խաղադաշտից մարզիկների հասցեին արված վիրավորական ցանկացած արտահայտության հեղինակ ենթակա է պատասխանատվության, ընդհուպ մինչև կյանքի վերջն այդ խաղադաշտ չայցելելուն: Այդ դեպքում, երբ Sport.es-ն այսքան ինֆորմացիա ունի այս դեպքի առթիվ, ինչո՞ւ իրավապահները բացարձակապես անտեղյակ են ու քայլեր չեն ձեռնարկում... Անգամ ամենահանրաճանաչ մարզական աղբյուրներում մի հոդված էլ չկա, թե այդ «չարախինդ ֆաները» ենթարկվելու են պատասխանատվության:
Ինչևէ, այս տեղեկությունն այնքան թերի կողմեր ունի, որ դժվար է հավատալ: Բացի այդ՝ նշվում է, որ դեպքը տեղի է ունեցել «Սանիագո Բեռնաբեուում»՝ «Ռեալի» երկրպագուների բնօրրանում: Եթե այս մասին գրվեր այն դեպքում, երբ խաղը տեղի ունենար, օրինակ, «Կամպ Նոուում» կամ «Վիսենտե Կալդերոնում», կարելի էր որոշ չափով խելքին մոտ համարել, բայց «Սանտիագո Բեռնաբեուում»՝ երբեք...
Անզեն աչքով էլ կարելի է նկատել, որ այս քայլը «Ռեալը» կազմալուծելու հերթական հնարք է, որ ձեռնարկված է լրատվամիջոցի կողմից: Պետք չէ ուշադրություն դարձնել նմանօրինակ անհեթեթություններին:
Ուզում եմ վերջում նշել, որ այս հոդվածը գրում եմ ոչ թե որպես «Ռեալի» երկրպագու, այլ որպես վերլուծող մարդ, ով ապացույցների աննկարագրելի սակավության հետևանքով այսպիսի եզրահանգման է եկել: