Առաջին հորիզոնականում է հայտնվել «Ռեալ Մադրիդը»: Մադրիդյան ակումբը, որ վերջին 8 տարիներին համարվում էր աշխարհի ամենաեկամտաբեր ակումբը, դարձել է նաև ամենաթանկը աշխարհում՝ շրջանցելով երկրորդ հորիզոնականում հանգրվանած «Մանչեսթեր Յունայթեդին», որը դեռ ամռանը առաջին տեղում էր: Սակայն սա չի նշանակում, որ «կարմիր հրեշները» զիջել են այս հարցում, պարզապես «սերուցքայիններն» են շատ արագ ու արդյունավետ աճում՝ դառնալով ավելի մեծ ու շահութաբեր: 

Երրորդ տեղում է հայտնվել կատալոնական «Բարսելոնան»՝ բավականին զիջելով երկու առաջատարներին: 

Նշենք, որ ակումբների արժեքը որոշվել է՝ հաշվի առնելով թիմերի՝ ֆուտբոլային խաղերին ու տարբեր միջոցառումներին մասնակցելուց ստացված եկամուտները: 

«Ռեալ Մադրիդը», որ 2011/12 մրցաշրջանում գրանցել է 650 մլն դոլար եկամուտ, արժի 3,3 մլրդ դոլար, ինչը ավելի մեծ է, քան ցանկացած այլ ֆուտբոլային թիմի արժեքը: «Ռեալը» ստացել է 134 մլն դոլար զուտ շահույթ (շահույթը՝ հարկերի, մաքսերի, աշխատավարձերի ու ամորտիզացիայի հաշվարկումից հետո), ինչը առաջին ցուցանիշն է ֆուտբոլում, իսկ սպորտի բնագավառում զիջում է միայն ամերիկյան ֆուտբոլի (NFL) «Դալլաս Քոուբոյս» թիմի ցուցանիշին (227 մլն դոլար): 

Շնորհիվ մեծ հովանավորչական պայմանագրերի ու աստղային խաղացողների (Ռոնալդու, Կասիլյաս, Կակա և այլն)՝ «Ռեալի» եկամուտը վերջին երեք տարիներին աճել է 62%-ով: Ավելին, այս ցուցանիշը դեռ կաճի, քանի որ «Ռեալը» շուտով պայմանագիր կկնքի «Fly Emirates»-ի հետ, որը տարեկան ռեկորդային 39 մլն դոլար կվճարի թիմին: 

1. «Ռեալ Մադրիդ» - 3,3 մլրդ ամերիկյան դոլար 

2. «Մանչեսթեր Յունայթեդ» - 3,17 մլրդ 

3. «Բարսելոնա» – 2,6 մլրդ

4. «Արսենալ» – 1,32 մլրդ

5. «Բավարիա» – 1,3 մլրդ

6. «Միլան» – 945 մլն

7. «Չելսի» – 901 մլն

8. «Յուվենթուս» – 694 մլն

9. «Մանչեսթեր Սիթի» – 689 մլն

10. «Լիվերպուլ» – 651 մլն