«Բեռնաբեուի» խանութում արդեն ավանդական դարձած միջոցառումների շարքի հերոսն այս անգամ Մարսելոն էր: «Ռեալի» պաշտպանն ինքնագրեր բաժանեց և լուսանկարվեց երկրպագուների հետ, նա նաև խոսեց ակումբի վերջին նորությունների մասին և պատմեց այն մասին, թե ինչպես է իրեն զգում Չեմպիոնների լիգայի կիսաեզրափակիչից առաջ. «Մենք լավ վիճակում ենք, պարզ է, որ ցանկանում ենք հայտնվել երկար սպասված եզրափակիչում, բայց գիտենք, որ «Բորուսիան» շատ ուժեղ մրցակից է: Մենք «Բեռնաբեուում» ոչ-ոքի ենք խաղացել և գիտենք, որ նրանք հզոր թիմ ունենք: Մենք լավ ենք մեզ զգում: Երկու թիմերը նման են միմյանց: Նրանք շատ են գրոհում և հարձակվելիս նման են մեզ»:
Մադրիդի եզրային պաշտպանը կարծում է, որ Դորտմունդի «Բորուսիան» ուժեղ է իր ամբողջության մեջ. «Լևանդովսկու դեմ պաշտպանվելը նույնքան բարդ է, որքան նրա ազգանունն արտասանելը: Ողջ թիմն է շատ ուժեղ և մենք չենք մտածում առաձին ֆուտբոլիսնտերի մասին: Տեսնենք, թե ինչպես կստացվի, քանի որ շատ ենք ցանկանում հասնել եզրափակիչ: Մենք լավ ենք գործում և շատ կենտրոնացած ենք: Մենք միասնական ենք հանդերձարանում և դա ցույց ենք տալիս խաղադաշտում: Շատ շատ են խոսակցությունները Չեմպիոնների լիգայի 10-րդ գավաթի մասին: Դա երազանք է մեզ համար, բայց առաջին հերթին մենք երազում ենք հասնել եզրափակիչ և քայլ առ քայլ առաջ գնալ: Մենք մեծ հնարավորություն ունենք և կտեսնենք, թե արդյոք կկարողանանք դա անել»:
Մարսելոն խոսել է նաև Սան Մամեսում թիմի տարած հաղթանակի մասին. «Ես մի փոքր հոգնած եմ, բայց շատ ուրախ եմ: «Սան Մամեսը» հիանալի մարզադաշտ է և անընդհատ զգում ես երկրպագուների ճնշումը: Ափսոսում եմ, որ այլևս չենք խաղալու այդ մարզադաշտում»: Նա նաև պատմել է, որ ամբողջովին վերականգնվել է վնասվածից. «Ձմեռը շատ դժվար էր ինձ համար, իմ նպատակն էր մրցաշրջանի վերջում լավ վիճակում լինել և այժմ շատ ավելի լավ եմ զգում»:
Մարսելոյի կարծիքով Մոուրինյոի թիմը մրցաշրջանի եզրափակիչ հատվածին մոտենում է լավ մարզական և հոգեբանական վիճակում. «Մենք շատ երջանիկ ենք, որ մրցաշրջանի եզրափակիչ հատվածում ենք, հասել ենք Չեմպիոնների լիգայի կիսաեզրափակիչ և գավաթի եզրափակիչ: Բացի այդ մենք մասնակցելու ենք Կոնֆեդերացիաների գավաթի խաղարկությանը, որը նույնպես ակնկալում ենք հաղթել»: Գավաթի եզրափակիչի մասին նա ասել է. «Հիանալի հանդիպում է լինելու, հատկապես Մադրիդի «Ռեալի» համար, քանի որ խաղը կայանալու է «Բեռնաբեուում»: Հուսով եմ՝ ամեն ինչ կտանք հաղթելու համար»:
|