«Գալաթասարայի» դեմ հանդիպումից հետո «Ռեալի» պաշտպան Պեպեն հանդիպել է լրագրողների հետ ու նշել, որ թիմը շատ ուրախ է հաջորդ փուլ անցնելու առիթով:
«Թիմը պայքարեց ու մեծ ջանքեր գործադրեց: Մենք շատ ուրախ ենք, որ անցել ենք հաջորդ փուլ: Առաջին կեսում մենք շատ լավ մեկնարկեցինք: Ճիշտ է, երկրորդ կեսում մենք թուլացրինք զգոնությունը ու այդքան էլ լավ չէինք խաղում, բայց խաղավերջում մենք բարելավեցինք մեր խաղը: Ամենակարևորն այն է, որ անցել ենք հաջորդ փուլ»,- նշել է պորտուգալացին:
Պեպեն, ում մասնակցությունը խաղից առաջ վտանգի տակ էր, քանի որ նա վնասվածք էր ստացել «Լևանտեի» դեմ խաղի ժամանակ, խոսել է նաև իր առողջական վիճակի մասին.«Կարևորն այն է, որ կարողացա ամբողջությամբ ապաքինվել ու թիմին օգնել այս խաղում»:
Հիմա թիմը կիսաեզրափակչում է, որտեղ իր մրցակցի անունը կիմանա ուրբաթ օրը: Այս մասին Պեպեն նշեց հետևյալը.«Մենք պետք է սպասենք ու տեսնենք, թե որ թիմի դեմ պետք է խաղանք, ինչից հետո պետք է կենտրոնանալ միայն մեր խաղի վրա: Պետք է շատ կենտրոնացած լինենք: Մենք ուզում ենք ավելի առաջ գնալ այս մրցաշարում»:
Եվ վերջում Պեպեն գովեստի խոսքեր հղեց Կրիշտիանու Ռոնալդուի հասցեին, ով երկու գոլ խփեց թուրքական թիմի դարպասը.«Նա անզուգական էր: Նա հիանալի աշխատանք է կատարում, շատ է օգնում թիմին, ու մենք հույս ունենք, որ նա կշարունակի նույն ոգով»:
| 
