Կրիշտիանու Ռոնալդուն Չեմպիոնների լիգայում խփել է իր 50-րդ գոլը և շրջանցել արգենտինացի գոլահար Ալֆրեդո դի Ստեֆանոյին: «Ռեալ Մադրիդի» հարձակվողը Չեմպիոնների լիգայում այդ 50 գոլերից 34-ը հեղինակել է «Արքայական ակումբի» կազմում, իսկ 16-ը՝ «Մանչեսթեր Յունայթեդի» կազմում:
«Ռեալ Մադրիդը» ապահովեց իր տեղը Չեմպիոնների լիգայի կիսաեզրափակչում՝ «Գալաթասարային» հաղթելով: Քառորդ եզրափակչի պատասխան խաղում Ռոնալդուի երկրորդ գոլը 50-րդն էր ֆուտբոլիստի համար Չեմպիոննների լիգայում: Այդ 50 գնդակների շնորհիվ Ռոնալդուն շրջանցեց Դի Ստեֆանոյին, ով Չեմպիոնների լիգայում 49 գոլի հեղինակ է դարձել:
Կրիշտիանու Ռոնալդուն Եվրոպայի ամենահեղինակավոր մրցաշարի այս տարվա խաղարկության լավագույն ռմբարկուն է: «Մանչեսթեր Յունայթեդում» անցկացրած վեց տարիների ընթացքում Ռոնալդուն Չեմպիոնների լիգայում ընդամենը 16 անգամ է գրավել մրցակցի դարպասը, իսկ «Ռեալ» տեղափոխվելուն պես նրա արդյունավետությունը կտրուկ աճեց:
«Ռեալում» անցկացրած առաջին մրցաշրջանում (2009/2010) Ռոնալդուն Չեմպիոնների լիգայում դարձավ յոթ գոլի հեղինակ, երկրորդ մրցաշրջանում (2010/2011)՝ վեց գոլի հեղինակ, իսկ անցած մրցաշրջանում (2011/2012)՝ տասը գոլի հեղինակ: Այս մրցաշրջանում նա արդեն 11 գնդակ է ուղարկել մրցակցի դարպասը: Այսպիսով, «Ռեալ Մադրիդի» կազմում Ռոնալդուն Չեմպիոնների լիգայում 34 գոլի հեղինակ է դարձել՝ անցկացնելով 38 հանդիպում:
|