Վերլուծենք թիմերի անցկացրած վերջին հինգ հանդիպումները: Սկսենք «Ռեալից: «Արքայական ակումբը» հինգ խաղ առաջ մրցեց «Սելտայի» հետ: Չնայած այն հանգամանքին, որ հանդիպման առաջին կեսում հյուրերը չէին կարողանում առաջ անցնել հաշվի մեջ՝ Կրիշտիանու Ռոնալդուն 61-րդ րոպեին առաջ մղեց մադրիդցիներին: Երկու րոպե անց տանտերերը հաշիվը դարձրին 1:1, բայց «Արքայական ակումբը» կարողացավ ի վերջո առավելության հասնել: Ռոնալդուն խփեց թիմի հաղթական գոլը: Հաջորդ մրցակիցն առաջնության ձախողակներից էր՝ «Մալյորկան», որի դարպասը «Ռեալն» ուղարկեց հինգ գնդակ՝ սեփականն ընդունելով երկուսը: Հատկանշական է, որ այս հանդիպման մեկնարկը ևս բարդ ստացվեց «բլանկոսների» համար, քանի որ երկու անգամ նրանք հետապնդողի դերում հայտնվեցին: Ստացվում է, որ երեք տուր առաջ «Ռեալը» պաշտպանական խնդիրներ ուներ, չնայած հաղթանակներ էր տոնում: Այդ խնդիրները շարունակական եղան նաև հաջորդ տուրում՝ այս անգամ ստանալով իրենց արտացոլանքը հանդիպման լուսատախտակին: Նորից «Ռեալը» հայտնվեց հետապնդողի դերում, սակայն կարողացավ ոչ-ոքի ավարտել պայքարը: Թիմի հաջորդ մրցակիցը «Գալաթասարայն» էր, որի դեմ հանդիպումը խնդրահարույց չեղավ: Երևի թե այս խաղին տրամադրվածությունն ու միտումն ավելին էին, քան նախորդ երեքին, որոնց ընթացքում երկու հաղթանակ հաջողվեց տանել: «Ռեալն» այս հանդիպմանը առանց լուրջ պրոբլեմների երեք գնդակ ուղարկեց թուրքերի դարպասը՝ պատասխան խաղից առաջ գործնականում լուծելով ծառացած խնդիրը, այն է՝ կիսաեզրափակիչ փուլ դուրս գալը: Հաջորդ խաղը Լա լիգայի շրջանակներում էր՝ «Լևանտեի» դեմ մրցավեճը, որի ժամանակ մադրիդցիները նորից հետապնդողի դերում էին, սակայն ֆանտաստիկ come back արեցին՝ հաղթելով 5:1 հաշվով:
Ինչ վերաբերում է «Գալաթասարային», ակումբը վերջին հինգ խաղերում միայն մեկ անգամ է սայթաքել, որը վճռորոշ է կարծես, քանի որ խոսքը հենց «Ռեալի» դեմ խաղի մասին է: Մնացած հանդիպումներում թուրքական ակումբն առավելության է հասել: Հինգ խաղ առաջ «Գալաթասարայի» մրցակիցը «Շալկեն» էր, որի նկատմամբ թիմը կարողացավ առավելության հասնել, չնայած բավական լարված պայքար ստացվեց: Խաղն ավարտվեց 2:3 հօգուտ «Գալաթասարային»: Հաջորդ խաղը Թուրքիայի Սուպերլիգայի շրջանակներում էր: «Գալաթասարայի» մրցակիցը «Կայսերիսպորն» էր, որի դարպասն առաջատարներն ուղարկեցին երեք գնդակ: 90-րդ րոպեին մրցակցին հաջողվեց հեղինակության գոլ խփել: Հաջորդ խաղն «Ստամբուլի» դեմ էր, որի դարպասը «Գալաթասարայն» ուղարկեց երկու անպատասխան գնդակ: «Գալաթասարայի» ճամփան կտրեց «Ռեալը»՝ թուրքական թիմի ու Չեմպիոնների լիգայի հաջորդ փուլի միջև մեծ անջրպետ դնելով: «Ռեալից» կրած պարտությունից հետո «Գալաթասարայը» ևս մեկ հանդիպում անցկացրեց՝ մրցելով «Մերսին Իդմանյուրդուի» հետ: Հատկանշական է, որ «Գալաթասարայի» հարկի տակ կայացած հանդիպման հաշիվը բացեց այն թիմը, որ ներկայումս ընթանում է մրցաշարային աղյուսակի վերջին հորիզոնականով: Ճիշտ է՝ տանտերերին ի վերջո հաջողվեց երեք գոլ խփել ու հաղթել 3:1 հաշվով, բայց «Գալաթասարայի» մոտ անվստահությունն ակնառու էր:
Թիմերի գրանցած արդյունքները գրեթե հավասար էին, սակայն պետք չէ մոռանալ, որ «Գալաթասարայը» հանդես է գալիս Թուրքիայի առաջնությունում, իսկ «Ռեալը»՝ Իսպանիայի, իսկ այս առաջնությունները կարգերով միմյանցից մի գլուխ տարբեր են:
Առջևում «Գալաթասարայ» - «Ռեալ Մադրիդ» հանդիպումն է, որը գործնականում ոչինչ չի որոշելու, չնայած ֆուտբոլում ամեն ինչ հնարավոր է: Ամեն պարագայում խոստումնալից խաղ է, հուսանք՝ կլինի նաև գոլառատ:
