Դիդյե Դրոգբան վերադարձել է, և նա դեռ վտանգավոր է: Այն օրը, երբ իվուարցին պաշտոնապես ներկայացվեց որպես «Գալաթասարայի» ֆուտբոլիստ, թիմի գլխավոր մարզիչ Ֆատիհ Թերիմը հայտարարեց, որ ֆուտբոլիստին անհրաժեշտ է մոտ մեկ ամիս, որպեսզի վերադառնա իր լավագույն մարզավիճակին: Թուրք մարզիչը անհանգստանում էր, որ 35-ամյա ֆուտբոլիստի վերջին ժամանակների անգործությունը կարող էր վատ հետևանքներ ունենալ: Սակայն ժամանակը ցույց է տալիս, որ «իվուարցի փիղը» պատրաստ է Չեմպիոնների լիգայի մեծ խաղերին: Դրոգբան լավ գոլային ցուցանիշներ ունի Իսպանիայում: Նա հինգ անգամ գրավել է իսպանական չորս տարբեր թիմերի դարպասները: Նրա գոլը «Բարսելոնայի» դարպասը 2006/2007 մրցաշրջանում մտել է պատմության մեջ նրանով, որ Մուրինյոն այդ գոլը տոնեց ծնկների վրա «Բարսելոնայի» պահեստային նստարանների առջև: Մեկ տարի անց, 2007/2008 մրցաշրջանում Դրոգբայի «Վալենսիայի» դարպասը ուղարկած գնդակը օգնեց «Չելսիին» հաղթել «Մեստալիայում» 1-2 հաշվով: Հաջորդ անգամ նրա գնդակը պարտության մատնեց «Ատլետիկո Մադրիդին» «Վիսենտե Կալդերոն» մարզադաշտում: Սակայն մինչև «Բարսելոնայի», «Վալենսիայի» և «Ատլետկիոյի» դարպասները գնդակ ուղարկելը նա աչքի էր ընկել «Սանտիագո Բերնաբեոյում»: Դա տեղի էր ունեցել 2003 թվականի սեպտեմբերին, երբ դեռ 23-ամյա հեռանկարային ֆուտբոլիստը հանդես էր գալիս Օլիմպիկի «Մարսելում»: Դիդյեն այդ օրը իրեն շատ լավ դրսևորեց, բացեց խաղի հաշիվը, չնայած նրա թիմը պարտվեց 4-2 հաշվով:
| 
