19.03.13թ.
Ինչպես հիշում ենք, վերջերս Մադրիդի «Ռեալի» գլխավոր մարզիչ Ժոզե Մոուրինյոն հայտարարել էր, որ 2012 թվականի լավագույն մարզչին որոշելիս քվեարկության ժամանակ եղել են խախտումներ. «Ես մի կաթիլ անգամ չեմ զղջում, որ չեմ գնացել ՖԻՖԱ-ի գալա-համերգին, որտեղ հայտնեցին տարվա լավագույն մարզչի անունը: Բանն այն է, որ որոշ մարդիկ զանգահարել են ինձ ու հայտնել, որ քվեարկել են իմ օգտին, բայց արդյունքում նրանց ձայները վերագրվել են այլոց»:
20.03.13թ.
ՖԻՖԱ-ի պատասխանը իրեն երկար սպասեցնել չտվեց: Մեկ օր անց ՖԻՖԱ-ն հայտարարեց, որ քվեարկության գործընթացը խախտումներ չի պարունակել. «Մենք հաստատում ենք, որ մեր կազմակերպության կայքում հրապարակված ձայների ցանկը ճիշտ է»:
Սակայն իրավիճակն անսպասելի զարգացում ունեցավ: «Նապոլի» հարձակվող և Մակեդոնիայի ֆուտբոլի հավաքականի ավագ Գորան Պանդևը նույն օրը հաստատեց Ժոզե Մոուրինյոյի խոսքերը. «Ես քվեարկել եմ Մոուրինյոյի օգտին: Երբ ձայները հաշվարկվեցին, և ՖԻՖԱ-ն հրապարակեց արդյունքները, ես հասկացա, որ կատարվել է ինչ-որ տարօրինակ բան: Համաձայն փաստաթղթերի` ես քվեարկել եմ Վիսենտե դել Բոսկեի օգտին:
Ես զանգահարեցի Մոուրինյոյին, որպեսզի ասեմ, որ իրականում քվեարկել եմ նրա օգտին: Ցավոք, ՖԻՖԱ-ում կատարվում են այդպիսի տարօրինակ, անբացատրելի բաներ»:
21.03.13թ.
Բնականաբար, ենթադրվում էր, որ ՖԻՖԱ-ն չպետք է անպատասխան թողնի իրավիճակի այսպիսի ընթացքը և հինգշաբթի տարածեց հայտարարություն, որ կազմակերպությունում առկա է փաստաթուղթ, համաձայն որի Պանդևը քվեաթերթիկում առաջին տեղում նշել է Դել Բոսկեին, երկրորդում` Մանչինիին, երրորդում` Կլոպին, և որ հարկ եղած դեպքում ֆուտբոլային հանրությանը կներկայացվի տվյալ փաստաթուղթը:
Մի քանի ժամ անց, իսկապես, ՖԻՖԱ-ն ներկայացրեց տվյալ քվեաթերթիկի պատճենը, որտեղ Պանդևը նշել է Վիսենտե Դել Բոսկեին` որպես 2012 թվականի լավագույն մարզիչ: Քվեաթերթիկի վրա առկա է 29-ամյա ֆուտբոլիստի ստորագրությունը: