Միջազգային օլիմպիական կոմիտեի (ՄՕԿ) անդամները արդեն մի քանի օր է, ինչ ստուգայցեր են կատարում Մադրիդ քաղաքի կարևորագույն սպորտային կառույցներում՝ կապված 2020 թվականի օլիմպիական խաղերի հետ: Կոմիտեի 17 անդամներ Մադրիդում գտնվելու առաջին իսկ օրը օգտագործեցին «Սանտիագո Բեռնաբեուն» տեսնելու համար: «Ռեալի» նախագահ Ֆլորենտինո Պերեսը, առաջին թիմի ավագ Իկեր Կասիլյասն ու արտաքին կապերի գծով տնօրեն Էմիլիո Բուտրագենիոն ընդունեցին խմբին, որին ուղեկցում էին նաև Մադրիդի քաղաքապետ Անա Բոտելյան, Իսպանիայի օլիմպիական կոմիտեի նախագահ Ալեխանդրո Բլանկոն ու երկրի սպորտի նախարար Միգել Կարդենալը:
Միջազգային օլիմպիական կոմիտեն ընտրություն է կայացնելու Մադրիդի, Տոկիոյի ու Ստամբուլի միջև ու սեպտեմբերի 7-ին հայտնելու է, թե որ քաղաքը կընդունի 2020 թվականի օլիմպիադան:
Խաղադաշտի որակը ստուգելու համար հանձնաժողովի անդամները դուրս եկան «Բեռնաբեուի» խոտածածկ, որտեղ եզակի հնարավորություն ստացան փորձել իրենց ուժերը Իկեր Կասիլյասի դեմ 11 մետրանոց հարվածաշարում: Որպես եզրափակում բոլորը միասին լուսանկարվեցին, իսկ թիմի հանդերձարանում հանձնաժողովի անդամները ստացան անվանական մարզաշապիկներ:
|