Ինչպես հաղորդում է իսպանական «ԱՍ» պարբերականը, Մադրիդի «Ռեալի» և Իսպանիայի հավաքականի դարպասապահ Իկեր Կասիլյասը կարող է խաղադաշտ դուրս գալ մարտի 30-ին կայանալիք «Սարագոսայի» հետ արտագնա հանդիպմանը: Ուղիղ 10 շաբաթ պահանջվեց նախատեսված 12-ի փոխարեն Կասիլյասի վերականգնման համար: Հիշեցնենք որ դարպասապահը վնասվածք էր ստացել հունվարի 23-ին կայացած Արքայական գավաթի պատասխան հանդիպման ժամանակ:
Երեկ Իկերը իր ֆեյսբուքյան էջում տեղադրել էր մի տեսահոլովակ, որտեղ նա գնդակով աշխատում էր մարզիչ Սիլվիո Լաուրոի հետ: Նա նաև շնորհակալական խոսք է հղել իր միլիոնավոր երկրպագուներին, ապաքինման ընթացքում իրեն աջակցելու համար:
«Շնորհակալ եմ բոլոր նրանց, ովքեր այս շաբաթների ընթացքում իմ կողքին էի: Փորձությունը հաղթահարված է, թունելի վերջում լույս է երևում»,- գրում է իսպանացին:
Հիմա Կասիլյասը շարունակում է մարզումները մարզադահլիճում, ինչպես նաև ամենօրյա երկժամանոց մարզումները խաղադաշտում: Ինքը Կասիլյասը գոհ է վիրահատությունից: Այսպիսով, մարտի 30-ին նրա խաղադաշտ դուրս գալը կախված է, ոչ թե վնասվածքից, այլ գլխավոր մարզիչ Ժոզե Մոուրինյոի որոշումից:
| 
