Միայն Ժոզե Մոուրինյոն կարող էր ետ նայել նախորդ երկու շաբաթներին և ասել, որ առանձնահատուկ ոչինչ չկար:
«Օլդ Թրաֆորդում» տարած հաղթանակը և սեփական ու մրցակցի հարկերի տակ «Բարսելոնայի» նկատմամբ հաղթանակների մասին շատ մարզիչներ կարող են միայն երազել: Բայց Մադրիդի «Ռեալի» գլխավոր մարզիչը միայն թոթվեց ուսերը և ժպտաց այն պնդումից հետո, որ նման արդյունքները զարմանալի են: Սկզբում հիմնական մրցակցի «Բարսելոնայի» նկատմամբ 3-1 հաշվով հաղթանակն էր «Նոու Կամպում», որի շնորհիվ թիմը հասավ Արքայական գավաթի եզրափակիչ, ապա դրան հետևեց «Բեռանբեուում» Լա Լիգայի շրջանակներում տարած 2-1 հաշվով հաղթանակը: Իսկ վերջում «Օլդ Թրաֆորդում» կայացած Չեմպիոնների լիգայի խաղում «Մանչեսթեր Յունայթեդի» դեմ 2-1 հաշվով հաղթանակն էր: Սակայն մարզիչն այսպես է գնահատում տեղի ունեցածը.
«Այո, լավ շաբաթ էր, երեք լավ հաղթանակ տարանք, բայց ավելի մեծ ու ավելի լավ հաղթանակներ էլ եմ ունեցել: Հաղթական լավագույն շղթան «Ինտերի» հետ տարած երեք անընդմեջ հաղթանակներն էին, որոնք երեք տիտղոս բերեցին: Սկզբում Իտալիայի գավաթի եզրափակիչում հաղթեցինք «Ռոմային»: Հետո հաղթեցինք «Սիենային» ու դարձանք Իտալիայի չեմպիոն, իսկ վերջում Մադրիդում կայացած Չեմպիոնների լիգայի եզրափակիչում հաղթեցինք «Բավարիային»: Այդ դա էր յուրահատուկ հաղթական սերիան»:
Այս հաղթանակներն իսկապես արժեքավոր էին Մոուրինյոյի և իր միլանցի սաների համար. առաջին անգամ իտալական թիմը հաղթում էր երեք տիտղոսները: Այդ հաղթանակներից մեկի արդյունքում պորտուգալացի մասնագետը երկրորդ անգամ դարձավ Չեմպիոնների լիգայի հաղթող: Այժմ նրան երեք մրցակից է բաժանում երրրոդ հաղթանակից և Լոս Բլանկոսի 10-րդ պատմական հաղթանակից: «Միգուցե կհասկանք, թե ինչու յոթերորդ երկնքում չեմ «Օլդ Թրաֆորդում» տարած հաղթանակի արդյունքում: Իհարկե, կարևոր հաղթանակ էր և գիտեմ, որ կարող ենք շարունակել այստեղից և հաղթել Չեմպիոնների լիգան: Բայց նաև գիտեմ, որ կարող ենք հենց հաջորդ փուլում դուրս մնալ, քանի որ Չեմպիոնների լիգան լի է լավ թիմերով: Այնպես որ ես հանգիստ եմ և սառն եմ դատում»:
Իսկ արդյոք բավական սառն է դատում, որ արդեն կարողանա պատասխանել ապագայի մասին հարցին, թե արդյոք Եվրոպայի չեմպիոնի կոչումը նվաճելուց հետո կհեռանա Մադրիդից: «Ես երբեք իմ որոշումները չեմ կառուցում նրա վրա, թե արդյոք կհաղթեմ, թե ոչ: Ես ամեն օր աշխատում եմ ամենաբարձր մակարդակով և մտածում եմ միայն ակումբի մասին և երբեք չեմ անհանգստանում ինձ համար»:
Բայց անկեղծ լինենք: Իր կարգավիճակով Մոուրինյոն անհանգստանալու պատճառ չունի: Քանի որ եթե, ինչպես սպասվում է, նա ամռանը հեռանա Մադրիդի «Ռեալից», շատ ակումբներ կլինեն, որոնք կպայքարեն նրա ստորագրության համար: Նշվում է, որ նրան ցանկանում են հրավիրել «Չելսին», ՊՍԺ-ն, «Միլանը» և «Մանչեսթեր Սիթին»: Նույնիսկ նշվում է, որ նա կարող է «Մանչեսթեր Յունայթեդում» փոխարինել Ալեքս Ֆերգյուսոնին: Նրա լավ հարաբերությունները շոտլանդացու հետ, անթաքույց հարգանքը ակումբի և ակումբի պատմության նկատմամբ, ինչպես նաև լավ հարաբերությունները «Օլդ Թրաֆորդի» երկրպագուների հետ, նրան դարձնում են Ֆերգիի հեռանալու դեպքում նախընտրելի թեկնածու: Մոուրինյոն նաև լավ խոսքեր էր շռայլել «Ռեալի» դեմ խաղում 1000-րդ անգամ դաշտ դուրս եկած Ռայան Գիգսի հասցեին. «Ապշեցուցիչը» միակ բառն է, որը կբնութագրի Ռայան Գիգսին: Խաղից առաջ ես նրան ասացի, որ 90 րոպե նման մակարդակով խաղալը պարզապես հրաշալի է: Այլ բառեր չես կարող ընտրել: Համոզված եմ, որ սըր Ալեքսը շատ է հարգում Ռայանին և Պոլ Սքոուլզին: Այս տղաներին նա գիտի մանուկ հասակից: Երկրորդ, ես համոզված եմ, որ նա գիտի, որ նրանք դեռևս լավ վիճակում են և կարող են օգնել թիմին: Թիմը բաղադրիչների խառնուրդ է և երիտասարդները պետք է անհատականություններ ունենան իրենց կողքին, ովքեր կօգնեն նրանց աճել որպես ֆուտբոլիստներ»:
Մոուրինյոն հույս ունի որ իր ճախրող եզրային 28-ամյա Ռոնալդուն կկրկնի Գիգսի ու Սքոուլզի ճանապարհը. «Համոզված եմ, որ Կրիշտիանուն կարող է անել դա, բայց չգիտեմ, թե արդյոք ցանկանում է: Գիգսի և Սքոուլզի առանձնահատկությունը հենց նրանում է, որ նրանք կարող են խաղալ և ցանկանում են խաղալ: Ես միայն հուսով եմ, որ հանուն ֆուտբոլի Կրիշտիանուն նույնպես այդպես է ցանկանում»:
Այդպես ենք ցանկանում նաև մենք բոլորս:
|