Հիմնադրումից ի վեր արքայական ակումբը ինը անգամ նվաճել է Չեմպիոնների լիգայի գավաթը, 32 անգամ դարձել է Իսպանիայի չեմպիոն, 18 անգամ՝ տիրացել Իսպանիայի գավաթին, ինը անգամ՝ Իսպանիայի սուպերգավաթին, մեկ անգամ՝ Լիգայի գավաթին: Թիմը երեք անգամ հաղթել է Միջմայրցամաքային գավաթում, երկու անգամ՝ ՈւԵՖԱ-ի գավաթում և մեկ անգամ՝ Եվրոպայի սուպերգավաթում:
1902 թվականի մարտի վեցին պաշտոնապես ստեղծվեց «Մադրիդ Ֆուտբոլ» ակումբը: Այդ օրվանից ի վեր մադրիդցիները դարձան համաշխարհային ֆուտբոլի էտալոններից և FIFA-ի վարկածով թիմը հռչակվեց XX դարի լավագույն ակումբ: Թիմում խաղում էին այնպիսի լեգենդներ, ինչպիսիք էին Դի Ստեֆանոն, Պուշկաշը, Խենտոն, Ամանսիոն, Խուանիտոն, Բուտրագենյոն, Ռաուլը, Զիդանը, Կասիլյասը և Կրիշտիանու Ռոնալդուն, ովքեր օգնեցին թիմին ավելացնել տիտղոսների քանակը և արքայական ակումբի անունը տարածեցին ողջ աշխարհում: Իսկ «Ռեալը» իր ծննդյան111-ամյակի առթիվ նվաճեց ՉԼ-ի քառորդ եզրափակչի ուղեգիր:
Թիմի պատմության կարևոր մասնիկն է ինը անգամ Չեմպիոնների Լիգայում հաղթելու փաստը: Եվ ոչ մի թիմի չի հաջողվել ինը անգամ հաղթել վերը նշված հեղինակավոր մրցաշարում: «Ռեալի» թանգարանում կարելի է գտնել երեք Միջմայրցամաքային գավաթ, երկու ՈՒԵՖԱ-ի Գավաթ, մեկ ՈՒԵՖԱ-ի Սուպերգավաթ, La Liga-ի 32 չեմպիոնական տիտղոս, 18 Իսպանիայի գավաթ, ինը Իսպանիայի Սուպերգավաթ և մեկ Լիգայի գավաթ: Բացի սպորտային հաջողություններից «Ռեալը» ձեռնամուխ է լինում տարածել բարձրագույն գաղափարներն ու արժեքները: Դրանք երիտասարդ սերնդին փոխանցվում են Սիուդադ–Ռեալ Մադրիդ սպորտային քաղաքում, որտեղ գտնվում է մանկապատանեկան թիմի դպրոցը: Վալդեբեբասի տարածքում է գտնվում նաև «Ալֆրեդո Դի Ստեֆանո» մարզադաշտը, որտեղ իր խաղերն է անցկացնում «Ռեալ Մադրիդ Կաստիլյան»: Իսկ Real Madrid Foundation-ը մասնակցում է մի շարք մշակութային և բարեգործական ծրագրերի:
| 
