Ամեն ինչ անելու ենք, որպեսզի «Ռեալ»-ի հետ հանդիպմանը մեր լավագույն խաղը ցուցադրենք: «Արքայական ակումբ»-ի դեմ միշտ բարդ է խաղալ, քանի որ «Ռեալ»-ը մեր ամենահզոր հակառակորդն է: Հիմա «Բարսա»-ն լավ մարզավիճակում է, չնայած, որ վերջին հանդիպումներում չկարողացանք ցուցադրել այն խաղը, որին ընդունակ ենք: Արդեն մոռացել ենք «Միլան»-ից կրած պարտությունն ու շարժվում ենք առաջ: «Բարսելոնա» - «Ռեալ Մադրիդ» առաջիկա խաղի նախախաղյա մամուլի ասուլիսի ժամանակ այսպես մեկնաբանեց սպասվող հանդիպումը կատալոնական «Բարսելոնա»-ի ու Արգենտինայի ազգային հավաքականի հարձակվող Լիոնել Մեսսին: Իսկ ահա Մադրիդի «Ռեալ»-ի պաշտպան Պեպեն ասաց. «Մենք պիտի խաղանք միայն մի բանի համար: Եթե այդպես անենք, ապա մեր՝ հաջորդ փուլ դուրս գալու հնարավորությունները կմեծանան: Պիտի վստահ լինենք մեր խաղաոճի վրա ու անենք այն, ինչ ասում է գլխավոր մարզիչը»:
Այսօր կատալոնական «Բարսելոնա»-ն «Կամպ Նոու» մարզադաշտում իսկական տոն է կազմակերպելու, տոն ողջ ֆուտբոլի համար, որ սահմանափակված չի լինելու սոսկ «Կամպ Նոու»-ի տարածքով: Այսօր հերթական բախումն է լինելու Կատալոնիայի ու Մադրիդի, «Բարսելոնա»-ի ու Մադրիդի «Ռեալ»-ի: Այս հզորագույն հակառակորդների դիմակայությունն այսօր նոր փուլ է ստանալու՝ վերածվելով եզրափակիչի: Սա իհարկե բնական է, եթե միայն հաշվի առնենք այն, որ Արքայական Գավաթի խաղարկության կիսաեզրափակիչի պատասխան խաղն է, առավել ևս այն դեպքում, երբ առաջին խաղը ոչ-ոքի է ավարտվել: Այսօր ամեն ինչ նորից է սկսվելու:
Առաջին խաղից հետո փոքր-ինչ առավելություն ունի «Բարսելոնա»-ն, քանի որ կարողացել է մրցակցի դաշտում գոլի հեղինակ դառնալ: Այնուամենայնիվ, այս պայքարն այնպիսիներից չէ, որ հաշվի է առնվում առաջին խաղը. յուրաքանչյուր խաղ, անկախ նախորդի արդյունքից, նոր փուլով ու տրամաբանությամբ է մեկնարկ ստանում:
Հատկանշական է, որ հանդիպումը վարելու է Ունդիանո Մալյենկոն, որի նշանակումն այդքան էլ գոհացնող չի Տիտո Վիլանովայի օգնական Ժորդի Ռոուրայի համար: «Խաղի մրցավարը հայտնի է, և նա այնպիսին է, ինչպիսին կա: Մենք չենք խոսի մրցավարությունից, բայց փաստերն են ապացուցում, որ այս մրցավարի վարած խաղերում մենք շատ ավելի վատ արդյունք ենք գրանցել, քան մյուսների: Դեռևս մեր հիշողության մեջ է 2011 թվականի գավաթային եզրափակիչը, երբ նա աչք փակեց մի քանի խախտման վրա: Մենք նրան հաջողություն ենք մաղթում: Հիմա պիտի կենտրոնանանք խաղի վրա. հենց մրցակցի մասին պիտի մտածենք»: Իսկ ահա Ժոզե Մոուրինյոն հեգնում է Ռոուրային՝ վերջինիս խորհուրդ տալով այնպես անել, որ թիմի ֆուտբոլիստները չկեղծակերպեն, ավելին՝ որոշակի դասեր քաղեն չստացված մրցավեճերից, ինչպես ինքն է անում: «Իսկ ես նախընտրում եմ մտածել այն դասերի մասին, որ «Բարսելոնա»-ն է մեզ տվել: Նկատի ունեմ մարզական ոգու մասին: Սա նշանակում է, որ պետք չէ մրցավարին ուղղություն ցույց տալ ու հրահրել քարտ ցույց տալ մրցակցին: Հարկավոր չէ նաև կեղծակերպել՝ դրան հասնելու համար»:
Ի դեմս Ալոնսոյի.
Մադրիդյան ակումբի համար ուրախալի լուրեր եղան հանդիպումից մի քանի ժամ առաջ: Պարզ դարձավ, որ ակումբի կիսապաշտպանության գլխավոր հենակետ Խաբի Ալոնսոն կարող է մասնակցություն ունենալ խաղին՝ պաշտպանելով «սերուցքայինների» գույները: Խաղին կարող է մասնակցել նաև Կարիմ Բենզեման, ով շատ է ցանկանում լավ դրսևորվել, քանի որ, ըստ նրա, վերջին շրջանում իր խաղն այդքան էլ լավ չի ստացվում:
Դե ինչ, այսօր՝ երեկոյան 23:55-ին, մեկնարկում է ոչ միայն «Բարսելոնա» - «Ռեալ» մրցավեճը, այլև Մեսսի - Ռոնալդու պայքարը: Այսօր Բենզեման ապացուցելու բան ունի ինքն իր նկատմամբ: «Բարսելոնա»-ն պիտի փորձի ապացուցել, որ «Միլան»-ից կրած պարտության անդրադարձը միայն լավն է եղել: Իսկ ինչպես կստացվի նրանց մոտ այդ ամենն այս անգամ՝ պարզ կդառնա միմիայն խաղի ընթացքում ու դրանից հետո...
|